3/5/17

Tot ye l'amor

Tot ye l'amor

T'aimar-te
sufiziens son plevidas d'amor,
gotetas que me canten
mientres fablas,
sufiziens sols
que alumbren os míos días,
sufiziens miradas
que no uellen más dolors,
colors de tu son sufiziens
ta pintar a mía alegría,
ta que cambeen as mars grisas
que acubilló iste corazón
e que torne a calma mía,
lo que perdié aguaitando
tristuras e zenisas.

T'aimar-te sufizién ye
que vienga una musica
dende os tuyos labios,
sufizién ye un sonriso
que en tu danze,
que fables compasiva
e tanta inchusta pena
ya no exista,
que sigas tu plevida
e aculla yo los besos
en a mía basa trista.
Tu la escoscarás, con tu brilan
as auguas d'a mía vida
e tot en o mío ortal
ye perfumato.

Sufizién ye tener vista
ta en un inte enamorar-se,
tener uditos e mans e labios
e minutos cada día
t'adorar-te,
tener alma ta que i viengas
cuan te cuaque
e perén ir recordando-te,
sufiziens son silenzios
ta que i fables,
sufiziens zielos
ta que i viengas a sulcar-me
con a bisa.

Sufizién ye que te cante
con os versos que tu escribas
en os aires d'a poesía.
Sufizién ye que yo t'aime
e que en tu desapareixca
sin más velos que m'amaguen
a belleza infinita,
viene a yo e fabla-me,
amor, as parolas más bonicas,
cuan viene o tuyo sol
se'n van tronadas tristas,
que perén yo marche
por a divina vía,
perén por o camín d'a tuya vida.

Chuan Chusé Bielsa Alquézar