8/26/08

Galizia

Barca d'o tresoro en a mar d'a mente

Barca d'o tresoro en a mar d'a mente
Pintura a l'olio de Chuan Chusé Bielsa

Nunca no he besitato Galizia.
Talmén nunca no besite Galizia.
Pero he abitato _puedo churar-lo_
una Galizia de parolas. Aimo
una Galizia de poetas.

Talmén os míos güellos
no beigan nunca o mío paradiso
atlantico, pero he sentito
en as luengas tardis lentas
un gotiar aimando como labios
en as carreras de Santiago,
gotas tinglando como musica
en un país de plebia.
Rosalía yera la prinzesa
d’os míos libros escolars.

Talmén nunca no besite a piedra
y a boira espullatas,
as tierras como barcas
adentrando-sen en mars.
Pero he bibito en pazos de parolas
con tautos d’alma umeda,
con baranas amorosiatas
por a molsa,
Galizia en plena esenzia,
sin tiempo y nabatiando
enta imposibles,
Galizia sin escarnio y sin feridas,
polidisma.

Dende Galizia partiban asobén
as rutas d’os míos suenios,
y barcas de boira
marchaban en as nueis
en busca de El Dorado d’a fantasía
enta países que nunca no estioron toquitiatos
por l’odio, que solamén esisten
en os mapas d’o polito :
Irlandas gubernatas por as fadas,
Cornualles, tierra d’os caballers d’a luz,
Bretañas miticas, Escozias intimas
besatas por o zielo,
Islandias de sagas,
elfos y ballenas lechendarias,
Groenlandias d’a fin d’o mundo,
an Erik o Royo prebó de bantar,
en o chelo, un paradiso,
Binlandias con as suyas ugas, luen,
dillá de tot confín.

Dende Galizia perén partió
una machia de distanzias, o paxaro
d’oro d’a reina d’o infinito.
Galizia en biache siempre
enta tot o intimo y o lexano,
fogaril d’a sagrata Poesía.
Galizia naxió d’os suyos poetas,
Galizia son paisaches de parolas
meditando,
son musicas y son cantas,
plebia intima cantando
en as carreras de l’alma.


Chuan Chusé Bielsa