MONCHE
ye muito triste
ser ixo que no somos
estrafollar o tiempo
emplindo repalmars de vuedos
no aturar de treballar
ta dimpués deixar-lo tot
cuan a la fin somos viellos
si te veigo
res no manca
aguaitar-te
ye o tresoro
si agora t'aimo e te siento
ya no calen más secretos
muito bueno
ye puyar con tu en l'airera
liberar-me d'o que asinas
como plega
marcha en l'inte como suenio
muito bueno
ye tener en o disierto
casetica
e cada día ir desfendo
lo que sin tu s'heba feito
ser monche e tener asinas
un treballo verdadero
aquel que tien os paseyos
por os paisaches que habitas
e a la tardada acaricia
o tuyo sol
qué goyo tener casa
do tien a casa o cielo
ilusions
ta puyar a la cambra
do m'asperas
deixar asinas canseras
quiero
ser lo que tu quieras
e veyer lo que tu veigas
contemplando-te
© Chuan Chusé Bielsa