12 de febrero de 2023

INTERNA ESTRELA

INTERNA ESTRELA

veyerás tardadas
calmas amariellas

qu'en tu s'acubillan

luscos veyerás
colors verdaderas

bien dentro de tu

e albas sinzeras
e fuens de silenzio

cuan tot bien aprendas

veyerás l'aimada
qu'en tu bien s'amaga

oblidata t'aima

perdiés en a tierra
totas as batallas

i veniés solenco

te'n irás d'aquí
espullato agüerro

sin radiz ni fuellas

qué mirache o mundo
mirallo de suenios

e sin primaveras

d'iste yermo marcho
do belún me quiera

e sin traidurías

aquí dentro alzo
o millor aniello

ixo que me queda

ta dar-lo en l'airera
a qui con yo vuela

con sinzeridá

nunca tenié más
qu'ixa interna estrela

yera ixo a vida

pordemás buscar
quimeras quimeras

trigar en l'aimar

reina qu'en o fundo
de yo me cusiras

realidá zenzera

defuera de tu
mentiras mentiras

e trobé l'amor

a tu compañera
do perén tu brilas

© Chuan Chusé Bielsa