4 de septiembre de 2011

Contemplazión

Foi silenzio

Porque me cal curar
muitas feridas
yo foi silenzio.

No enchego a radio, no veigo
a televisión. Tampó
no leigo.

Cosa no foi.

Contemplo,
y ya ye prou.
Voi escoscando lo tiempo
de roídos, de deseyos.

A vegadas uno
escribe ta uno mesmo
u ta lo zielo,
y un siñalín replega
d'a voz que clama
en os disiertos.

(Iste poema
no será guaire luengo,
será prou curto,
umilde,
fendo silenzio.)

Me'n voi
enta o país secreto
do viven vivos y muertos.
Una parola en orazión,
cuasi muerto lo yo,
siembro en o zierzo.

Yo sólo soi
canso guerrero,
canso de sangre y dolors
en os espiellos.

Porque me cal curar
muitas feridas
(que l'alma tiengo
tresbatita entre boiras, suenios
y milenta inútils pensamientos)
yo ya aturo, a la fin;
en calma aspero.

Porque me cal sentir
a o ser que yo más quiero,
a voz d'a mía aimata,
yo foi silenzio.

Chuan Chusé Bielsa