FABLAGÜERRO
E Fablagüerro en zagueras
s'emplenó de follarasca.
Cubrión
luscos amariellos
os sasos e as varellas
que yo aimaba.
Vals estión sexos de luz
en aparar a plevia
d'amoroseos dende as ramas.
En Fablagüerro bi ha encara
parolas que no reblan,
con alas vuelan
en l'aire por os cielos
e dimpués amorosean
tantos leitos de fuellas,
como linzuelos de tardadas,
luminarias son dormindo
asperando alto remeyo.
Cuan te'n vaigas,
bel vinyero serás en o disierto
a o canto
d'o mont de más altaria
en os adentros,
una estrela en a nueit se i posará,
beberás con os que aimabas
o millor d'os vinos d'os recuerdos.
Fablagüerro, t'aimé
cuan tot se coloriaba
con os pintes d'a nineza,
con parolas d'ixos viellos que yo aimaba,
con paisaches que amor daban.
Cuan veigas en l'hibierno
as planas con rosada,
Fablagüerro
como simient
alzará encara
a suya puenda,
Parola que redención perén aspera.
O Regno
d'a Poesía aguarda,
cobará,
e mesmo baixo as fuellas,
si cal eternament,
a Primavera.
© Chuan Chusé Bielsa