ARCHILA
archila tuya soi
oh fe con yo lo que tu quieras
os míos uellos modelatos
por l'amor
aimaré lo que deseyas
plega l'inte de dicir:
seré a boira
e volaré en o tuyo cielo
plega l'inte de volar
con alas tuyas
as mías mans ta tu se fizon
e asinas
con istos didos debuixa
o tuyo amor en as altarias
plega l'inte de naixer
e asinas
fe de yo
lo que te cuaca
si res no tiengo
en tu reposo
e cosa ya no manca
seré l'esposo
e tu serás a reina
seré corazón tuyo
truquetiando
en marcha
cuan me uelles e me muevas
que lo que diga yo muera
ta dicir lo que tu quieras
me'n iré por paradisos
e oblidaré as feridas
que tenié cuan no bi yeras
por ixo
iste cuerpo canso e viello
prene-lo en ofrenda
farás con istos labios besos
e con os míos brazos abrazadas
os míos uellos
veyerán a tuya primavera
en tu devantaré
l'amor como bandera
ixe amor que ye caricia
d'ixe sol que perén brila
si tot estió cenisa
treito d'a tuya presencia
albandonando tot
en tu
gano a vida verdadera
fe de yo
amor
lo que tu quieras
© Chuan Chusé Bielsa