Virchinidá
Foto: Chuan Chusé Bielsa
ENAMORATO
Enamorato
de sasos, de camins
por os que cuasi dengún pasa.
Enamorato d'a soledá
d'as selvas, enamorato
de varellas-paradisos.
enamorato d'ista lengua aragonesa
que piedra e polvo fablan,
que zielo e mon amagan,
que alienta en o que toco.
Enamorato de raso
d'un sublime silenzio.
Enamorato
d'a mía tierra xuta, pobra
e alta como los ánchels.
Enamorato d'a luz
cuan se torna lusco u tardada,
enamorato d'albas
ruxiando frescors por as carreras,
enamorato de falsas do vivir.
Enamorato e solo enamorato
d'a muller, asinas, d'a muller en cheneral,
d'a feminidá que también en yo vive
estando ombre. Enamorato
de güellos d'amor, de labios de choventú
que perdié, enamorato de viellos
que tienen as crepazas d'istos yermos,
enamorato d'a suprema mai, d'o esprito,
enamorato de l'alma cuan ye vueda
e aspera la plevida d'allá alto.
Enamorato d'os libros
que amoroseo con os didos
a bonico, enamorato d'o leyer
por leyer, por capuzar-me en o misterio
de yo mesmo cuan leigo,
enamorato d'a musica que me fa volar,
enamorato de danzar como l'airera
por os solencos campos, enamorato
de travesar a vida aimando, leyendo,
danzando, cuidando a mis pais ya viellos,
escribindo, soniando, aprendendo a morir,
enamorato d'aber trobato o que busco,
ixa escala enta yo mesmo, ixa escala
que puya e baxa enta zielos e disiertos,
enamorato de l'amor.
© Chuan Chusé Bielsa