Sols que se'n van (haiku)

Lusco d'ibierno;
as gatetas aparan
sols que se'n van.

Chuan Chusé Bielsa

Mandria tiengo de fuegos (haiku)

Anque ye ibierno,
mandria tiengo de fuegos
treito d'o eterno.

Chuan Chusé Bielsa

E ya regala (haiku)

Foto: www.freepik.es

Chelata l'alma,
oras a qui más t'aima
e ya regala.

Chuan Chusé Bielsa

Leigo tranquilo Aloma (haiku)

Felizidá:
leigo tranquilo Aloma,
de Rodoreda.

Chuan Chusé Bielsa

Eterniza voz

ETERNIZA VOZ

agora ye a ora
de l'Amor

ye a ora
d'o poder verdadero

dentra
en as nuestras endormisquiatas
almas o Misterio

nos esveila
pronunziando
a eternidá

o tiempo
xuto e falso ya remata
e o infinito Tiempo
de l'Amor
ye d'a Luz una plevida

siente
dentro de tu
cómo a Vida
fabla en o Corazón

bi ha un alba
coloriata d'una Voz
que nax en o Silenzio

ya no ye posible amagar
lo que ye e será

as almas con l'Amor
puyan en o viento
d'a verdá

ya no cal asperar

ubre os zielos
e nos n'iremos
a volar

cremón alas e uellos
durante muertos sieglos
en o furno de satán

con mentiras se'n irá
por o camín d'o fuego
qui negó perén l'Amor

ta cutio vivirá
lo unico que esistió:
dende un eterno sol
a Voz d'o Ser creyando

a infinita bondá

porque ye plegato
un inte sin espuendas en a Luz
e una Parola
ye estata pronunziata
en o Corazón

© Chuan Chusé Bielsa

Enamorato de Catalunya

Foto: www.fotolog.com

ENAMORATO DE CATALUNYA

Enamorato
de Catalunya,
e asinas lo escribo
con o corazón.

Enamorato
d'a lengua catalana,
que aprendié cuan yera nino
dende Aragón;
en ella he vivito
dende allora
en o paradiso.

Enamorato
de l'altiza dignidá
d'as tuyas chens,
Catalunya,
d'a tuya paz enfrén
d'a verenosa puncha
de l'odio e d'a invidia,
d'a mentira
e d'a más fiera maldá,
d'a fuerza bruta.

Catalunya, dexa
que t'escriba
iste corazón.

Dende iste Aragón
amortato como fuego
e ya zenisa,
asimilato, rendito,
achenullato debán
de furos amos,
Catalunya, dexa
que te diga:

t'aimo,
t'aimo,
t'aimo.

E para cuenta, amor,
sólo se pierde u se gana
en o país d'o corazón, e tu,
Catalunya, enamoras
con a sola luz d'a poesía,
d'a cultura e a razón.

Catalunya,
dexa que te diga
una parola:

patria,
patria,
patria mía.

© Chuan Chusé Bielsa

Foto: www.enciclopedia-aragonesa.com